無度數都要戴眼鏡？
“點樣推銷一個無近視嘅人買眼鏡?” (2020 updated)
呢個就係我收到嘅第一個問題。或者我可以答「叫佢買太陽眼鏡囉」，不過諗深少少，將條題目改一改，「點樣推銷一個本身無需要嘅人買眼鏡?」，可能比較有意義。老實講，作為消費者，相信大家一定試過買咗返屋企先呻笨:「點解我會買咗呢D垃圾?」。大家可能會賴個Sales油腔滑調，但講到尾，都係自己內心深處嘅魔鬼被喚醒了。不過令人買嘢從來都係靠衝動，而作為靠營業額開飯嘅我，其中一個方法，當然係慫恿啦!
回想返起我曾經做過嘅一間公司(算係比較高級同玩Fashion少少嘅公司)，Interview嘅時候個HR Manager同我講:「我地公司比較特別，會有視力正常嘅客幫襯，你要諗辦法sell」。當時嘅生態同依家不同，眼鏡喺香港尚未係公認嘅潮流飾品，大家都鍾意戴Con，所以嗰時要賣眼鏡比D客，就一定要由面客修飾著手，e.g. 戴咗塊面睇落瘦咗、紅潤咗、精神咗、遮黑眼圈、易襯衫等等都係一D魔術字眼，令客人買返個平光鏡戴。而修飾面部輪廓，同衣飾配襯亦慢慢成為矯正視力及保護眼睛之外兩個主要推銷點。加上對眼鏡嘅印象轉型，文青風嘅崛起，眼鏡嘅功用亦續漸多樣化。
曾幾何時好興齋戴框唔戴鏡片(即係好似上圖咁)，不過喺我嘅立場就梗係覺得多嚿魚啦! 加返對有功能嘅鏡片，最簡單防紫外線嘅鏡片, 已經可以防到飛沫同有害射線啦! (點解揀呢張? 因為私心推入山杏奈囉…)
講起呢個客人選擇上嘅轉型，又可以拉開少少講吓近來喺香港火熱「速食眼鏡店」。其實套裝眼鏡(即係鏡架連指定鏡片一套定價發售)不是新鮮事。千禧年成行成市的旺角樓上舖，到後來的Alook (已撤出香港)一路都做緊。不過近兩三年香港人鍾意去日本配眼鏡，貪其平靚正同快，加上款同質素，於是就有商家將個概念，甚至直接將日本嘅品牌引入香港。以前嘅客覺得因為有度數所以要戴眼鏡，爛咗先再換，或者淨換鏡片唔換鏡架；到依家當買衫一樣，打開櫃桶隨手執一副襯衫，平有平玩貴有貴玩，要追潮追款，隨時未爛都換過副。如此種種，連帶整個行業都熱鬧起來了。
2020 edit: 一個肺炎疫情，防飛沫變咗另一個好多人需要嘅功能。加埋近呢大半年來，越來越多人要在家工作/學習，小朋友近視突飛猛進，成年嘅就個個眼澀又眼痛，有老花嘅就越來越覺得自己嘅工作眼鏡唔夠洗。平光控制近視鏡同平光防藍光鏡直頭唔使sell都大量人問同買。雖然係咁，戴con嘅人呢排怕咗唔戴，始消彼長，生意一樣係難做….唯有希望政府做嘢好少少，快D搞掂個疫情啦!
好多家長擔心小朋友睇得電腦電話多變近視，於是就特登配副防藍光眼鏡比小朋友。想強調一點，防藍光嘅平光眼鏡唔會幫到小朋友控制近視咖! 真係擔心嘅話，第一代離焦鏡片加埋藍光，其實對比返同牌子嘅藍光鏡片都唔算貴，但就有多額外一個功能，可以考慮一下。
