點樣去眼鏡舖揀鏡片唔會比人水？

點解鏡片賣咁貴?

如果要揀一個topic最多人問，鏡片一定係Number one。鏡框可以試，啱唔啱一試就知(雖然都有好多客有選擇困難症)，不過鏡片製作過程有好多光學知識喺裡面，好多專業規格又非球又雙非，仲有鍍膜(coating)又防花不反光、又防UV、又防藍光，真係會睇到頭都大埋。而唔怕老實講，有睇過freakonomics嘅就會明咩叫資訊不對稱同埋點樣用呢樣嘢去賺客錢(我又唔可以講咁樣係呃)。聽過有個case，100度遠視做訂造1.74雙非球面，係收好貴，不過店家真係做咗對1.74雙非比佢，咁又真心明買明賣，最多話其實用五分一價錢做1.6非球面都可以做到一樣輕同薄嘅鏡片。

眼鏡鏡片零售價由平到300有找到過萬都有，最慘嘅地方係最貴未必係最好，更未必係最適合。唔想比人劈，可以了解吓鏡片參數，今次就簡單介紹吓有咩參數:

折射率 –

成日聽人講咩咩超薄，究竟點先算超薄?點解比多兩百做隻超薄都成塊磚頭咁厚?首先鏡片餐牌一定有個數字, 常見就1.5、1.56、1.6、1.67、1.74、1.76，簡單來講，數字越大，鏡片越薄，亦都越貴。

光學設計 -

咩叫光學設計?幾百呎樓就可以做室內設計，拎一張A4白紙可以喺上面做平面設計，一塊鏡片有兩面，當然可以做D功夫，令光主線穿過鏡片產生變化。大家成日聽嘅非球面，雙非球面就係屬於鏡片設計。理論上越精準嘅設計，睇嘢嘅扭曲失真就越少，價錢當然就越貴。

鍍膜 -

一開始，光學玻璃鏡片並無任何鍍膜，後來不反光鍍膜加在軍事望遠鏡上面避免反光被人偵察發現，而因為反光減少鬼影呢個好處，後來眼鏡鏡片都加上呢種鍍膜，甚至變成喺香港買眼鏡嘅標準配備。依家除咗不反光之外，防花膜、納米抗污鍍膜、防紫外光鍍膜、防藍光膜等等都常見，越多功能就越貴。

額外附加 -

加咗咁多，仲有嘢加?當然有啦，有D要另外收錢嘅項目例如染色、偏光、變色、特別度數訂造，呢一類唔屬於鍍膜功能嘅特別加工都係要另外收貴。

隨手都數都咁多，係咪樣樣都需要? 記住鏡片功能唔係加晒就好，之後我會逐樣同大家分析，因為每個鏡片範疇都多人問，但要解釋得清楚就要花好多篇幅，敬請期待!