鏡片真係越薄越好？

‘使唔使超薄鏡？’

相信做開眼鏡嘅見到呢個標題都會笑一笑，無錯，由今期開始我決定寫吓呢類「秒經」級問題，第一個當然就係超薄鏡片是否一定好呢，咩先算係超薄鏡片呢？

其實「超薄」呢個term喺以往配礦物玻璃鏡嘅年代已經有。大家都知道有樣嘢叫「折射率」，即係1.5、1.6呢D (唔知乜東東嘅朋友請看此：折射率）數值越大理論上鏡片就會越薄，而傳統上折射率1.6以上嘅我地都叫「超薄（Hi-Index)」鏡片。玻璃鏡片因為好重（密度高），所以配超薄/雅薄玻璃（1.6，1.7）嘅話，因為質量細咗，密度相差不大嘅情況下重量當然都少咗，喺當時梗係大受歡迎。不過當膠片鏡片面世之後（即係眼鏡舖講嘅樹酯纖維），因為密度低好多（1.x vs 3.x), 所以即使做隻厚嘅膠片鏡，都會輕過超薄玻璃一半咁滯，於是高折射率嘅玻璃（1.7、1.8、1.9）就漸漸變成超深度數人士先會選擇（因為製作深度數玻璃鏡片嘅成本比起膠片要低，同埋玻璃可以做到好深度數，包括遠近視同散光，對某D因為眼疾而需要深度數處方嘅客嚟講，係唯一嘅選擇）。

好，咁係唔係人人都要配超薄鏡片呢？首先以膠片來講，折射率分為1.5嘅標準物料CR39；然後就係超高韌度，折射率達1.59嘅聚碳酸酯（Polycarbonate)；再之後有各式膠片（1.56、1.6、1.67、1.7、1.74、1.76，各廠有自家材料，最著名就係日本三井化工嘅MR系列，亦係最普遍嘅）。基於唔同材料，除咗折射率唔同之外，其他參數（例如韌度、色散、密度）都有少少不同，所以對消費者來講，選擇困難真係唔出奇。今時今日價格大眾化，各項參數都平均嘅1.6「超薄」膠片就逐漸變成一個最大路嘅選擇。當然更平價嘅1.56鏡片就通常隨鏡架附送，多見於速食或套餐眼鏡店。最後，附上一張鏡片厚薄圖比大家參考，有咩唔明亦非常歡迎留個言傾吓。（圖片來自Pinterest)

我經常講一句，度數淺嘅咩鏡都薄，度數深嘅咩鏡都厚，最緊要睇吓自己budget，了解多d，按自己度數同需要去選擇。除咗折射率外，個人認為光學設計及功能都非常重要，下次再講。