咩叫高階單光鏡片? 高喺邊? 真係啱我?
高階單光鏡片除咗一定係訂造同埋貴D之外，有D客又真係一定要做個人化單光先戴得舒服
之前曾經有一篇講球面同非球面鏡片嘅分別，當時都有好多朋友問，雙非球面同某幾大廠嘅頂級鏡片比又有乜優勝同分別，令我都幾意外。 因為一般嚟講，配單光鏡片嘅客主要考慮折射率同鍍膜功能較多，而高階單光鏡片嘅市場熱度一向都唔算高，揀得嘅唔係有特別嘅要求，就係對眼鏡好有要求又好講究嘅客人。
高階單光鏡片同一般現成鏡片最大嘅分別，就係一般單光鏡片，即使係雙非球面鏡片，如果無寫明嘅話都會預設鏡片係90度角咁擺喺眼前面，即係光係成90度角入鏡片，而呢個並唔係人戴眼鏡嘅情況，而加入個人化數據去做計算就可以令鏡片更切合配戴者(不論係指定數據定係要提供個人化數據)，某D牌子更會嘗試將瞳孔大小或每個人對唔同干擾嘅敏感度同容忍度化成鏡片製作數據! 至於邊隻好過邊隻，我就不便評論，但我都會寫低我對每一隻鏡片嘅睇法，方便大家參考。
Position of wear 配戴位置參數已經係高階單光鏡片必然會考慮嘅資訊，呢樣亦係高階個人化鏡片對比起普通鏡片嘅最大分別
雖然唔需要好似漸進咁將不同嘅光度融合喺鏡片表面，不過高階單光鏡片，因為同漸進鏡片一樣需要做配戴數據嘅處理同考量，一定係用晒該牌子可以應用嘅高階技術，所以面非球面(Backside Aspherical)、散光非環面(Atoric)，數碼freeform打磨都一定係必然會用到。咁要比較市場上比較唔同牌子嘅高階鏡片，要比較嘅就係邊一隻嘅設計理念比較適合自己。
以下簡單講吓我認識嘅牌子嘅高階鏡片：
1. Essilor Azio SV
呢隻喺高階鏡片嚟講算係入門，最主要係因為佢只屬於底非球面鏡片，而唔係雙非球面鏡片。Azio即係亞洲數據，考慮較平嘅pantoscopic angle、較貼眼嘅BVD，即係多數香港配戴者嘅需要。由於佢應用嘅嘢都算係比較早期嘅嘢，價格上就比較低。呢隻係最早用freeform嘅底非球面鏡片之一，仲用咗essilor當時最先進嘅wave technology同埋360 digital surfacing，考慮咗不同方向嘅光波穿過鏡片時嘅散射，同時利用freeform技術喺鏡片上面作出修正，對於比較敏感嘅客人，或者散光比較犀利嘅客人都會有幫助。同埋佢有Blue UV Capture物料可以選擇，對於成日用電腦但又怕防藍光鏡睇嘢會偏黃嘅客人嚟講，呢個附加功能就顯得非常吸引。
簡評：
對於初次接觸高階單光鏡片嘅客人嚟講，呢一隻同我成日都介紹嘅Zeiss energize me Single vision 一樣，雖然唔係全個人化數據，不過因為比普通訂製鏡片更加考慮使用者配戴數據，加上價格親民，所以對於度數超越訂製範圍嘅客嚟講，非常值得一試。
咁多隻個人化單光鏡片裡面，得Essilor Azio同貴幾倍嘅Seemax Infinite可以揀比較白同較為通透嘅濾藍光物料，呢個算係一個幾唔錯嘅賣點
2. Hoya Nulux V+
Hoya 標榜應用Listing’s Law嘅雙非球面Nulux EP鏡片本身已經滿足咗絕大部分人嘅需要。但其實佢地嘅頂級產品係使用個人化數據做調整同修正嘅Nulux V+ （Listing’s Law係眼球回旋嘅理論，個理論係眼球向角位睇嘢其實係會旋轉咗少少，所以邊位嘅散光軸可能需要調整）。呢隻鏡香港hoya唔算落力推廣，所以喺頂級單光鏡片嚟講算係比較少人提及。驟眼睇佢同Nulux EP嘅分別只係多咗個人化數據，但價格上就算同訂製級嘅Nulux EP比較都高咗唔少。咁其實Nulux V+同Nulux EP當然唔止咁少差別，最起碼考慮咗個人化數據，就可以更精準咁做freeform逐點度數修正啦，仲會Nulux V+最犀利嘅地方係佢可以考慮埋雙眼數據（即係兩隻眼度數同焦點），再做運算同打磨，如果雙眼度數差別較大，就會有所幫助。而Hoya嘅雙非球面理念又同其他廠有少少唔同。
http://www.medicalsintl.com/Technologies/visioncare/HOYA0
簡評：
Hoya Nulux EP（即係普通雙非球面）現成鏡係好多希望有比非球面更好視覺效果嘅客人嘅選擇。只要焦點度得準，加上合適調較就可以得到唔錯嘅效果。相較之下，如果係追求頂級視覺效果嘅客（同視力唔同概念，視力水平係可以量化，例如VA。視覺效果，即係sharp D、矇D呢類，就主觀得多。），好多時都會去咗更講究嘅Nikon Seemax Infinite度。所以呢個係另一個點解Nulux V+比較小眾嘅原因。
除咗Nulux V+ 之外，Hoya另一種旗艦鏡片產品就係駕駛專用嘅enroute。
Hoya一直都強調佢地嘅鏡片係跟據人眼回旋定律去計算鏡片修正
3. Nikon SeeMax Infinite
喺光學鏡片牌子之中，Nikon同蔡司都算係名門。因為由光刻機去到相機鏡頭再去到眼鏡鏡片，幾乎同光學有關嘅呢兩家都有涉獵（不過Nikon鏡片早喺十幾年前已經同essilor合併咗），所以都真係唔少客係為咗個牌子同埋名氣去揀鏡片。曾幾何時Nikon嘅「八軸雙非球面」同蔡司嘅「40000研磨點」都係最先進鏡片技術嘅象徵。當然去到今時今日，各間鏡廠都已經擁有freeform數碼打磨技術，nikon都唔可以繼續食老本。2019年nikon就以八軸嘅基礎推出咗新嘅seemax infinite單光鏡片。八軸顧名思義，就係喺鏡片度劃分八條軸，透過考慮同控制每一條軸做出嚟嘅度數，理論上就可以做到比較精準嘅鏡片。而seemax另一個講究嘅地方係會考慮埋鏡架形狀，盡量將清晰區域擺晒喺鏡架裡面，而扭曲或者光學效果無咁好嘅地方就擺喺鏡形出面。令到配戴者盡享最清晰嘅地方。最後Infinite係Nikon嘅新嘗試，透過Ipad app, 了解配戴者對不同模糊嘅敏感度，盡量消除配戴者感覺到嘅模糊感，令鏡片更切合用家。（Nikon做marketing 做得唔錯，一搵就搵到一幅消費者容易明白同吸引介紹嘅圖。）
簡評:
作為最出名嘅頂級單光鏡片，「八軸雙非」由十幾年前已經係講究視覺享受嘅玩家所追捧。嚟到呢一代，Nikon嘅Seemax Infinite除咗將Seemax同SeeStyle(高彎八軸雙非球面)合併之外(所以Seemax Infinite係可以對彎嘅，Rudy Project呢類本身有彎嘅眼鏡就最fit)，有埋針對個人視覺需要嘅計算，亦都算係業界首創。由於呢D運算同數據化已經唔係普通配鏡會考慮嘅嘢，係咪真係會正咗我都唔敢講了，正如有人會用4 位數買耳機「線」，就係為咗聽女聲會甜D暖D，有人覺得Airpods已經好正一樣。不過要注意個人覺得seecoat blue/seecoat plus 喺防花度之上有少少落後，所以如果有得揀嘅話我會揀本地生產嘅版本(由香港essilor代工，因為Nikon鏡片部比Essilor買咗都有10–20年)，用返essilor 自家嘅sapphire膜，喺防刮同不反光方面都拍得住蔡司DVP。
4. Zeiss Superb/Smartlife/i-scription
蔡司鏡片一直以精密同銳利做賣點，經常會標榜「業界首創40000個研磨點」，而憑藉喺精密光學領域嘅地位（成日講，無咗蔡司，光刻機都生產唔到），蔡司嘅眼鏡鏡片，都成為咗最講究嘅客人嘅選擇。
簡評: 除咗nikon之外，另一間出名做高階鏡片嘅一定係蔡司啦! 由玻璃鏡片年代開始，蔡司已經代表住精密同清晰。而代表住鏡片製作最高標準嘅個人化鏡片，I-scription係必須配合I-profiler測量眼睛數據先至可以做到嘅鏡片。而由於香港有I-scription嘅店家印象中都係得一間，喺無做過亦戴過嘅情況之下，都無咩comment可以比到大家。
而喺i-scription之下，蔡司就將佢嘅高階單光鏡片分成三大類，分別適合唔同要求嘅客人，即係superb/drivesafe/smartlife。呢三種鏡片有乜分別呢？諗咗好耐，終於諗到一個最簡單嘅介紹同分類。首先，三隻鏡片都做咗360度點對點修正，同就咁嘅精密40000研磨點嘅最大分別，就係每一點所要度嘅球面度數、柱面度數、柱面軸向、稜鏡強度同埋稜鏡指向，都經過計算先磨落鏡片度。有一位前輩成日講，用freeform機車出嚟嘅球面鏡，依然係一片球面鏡。而Superb/Drivesafe/Smartlife嘅主要分別，就係Superb屬於基本型，而Drivesafe就有特製嘅鍍膜同埋更針對低光環境，瞳孔變大嘅情況做修正（因為依家鏡片生產商可以模擬唔同粗幼、唔同方向嘅光束穿過鏡片時候嘅情況去做修正，而Zeiss當然唔會例外）。至於Smartlife，同Drivesafe一樣有用瞳孔大小計算，不過個計算嘅條件係針對唔同年齡嘅人有唔同瞳孔大細嘅呢個生理現象，多一重計算，自然更適合配戴者。
人眼嘅瞳孔除咗會因應光暗而改變大小之外，其實隨住年紀增長，瞳孔都會越縮越細，嚟緊唔同鏡行嘅取向相信都會係針對人眼嘅生理結構去做調整同處理
總結：
一塊透明嘅鏡片，零售價格可以由幾十蚊一對去到幾萬蚊一對，當年仲有CD嘅年代，都成日講隻碟本身係唔值錢，入面嘅料先至係值錢嘅地方，某程度嚟講鏡片可以咁理解。個人覺得一對有抗刮、易潔、防UV同不反光嘅鏡片已經可以照顧日常嘅視力需要。超過300度遠/近視可以考慮非球面鏡片。如果係因深散光而要訂製鏡片，底非球面嘅鏡片就比教針對散光。至於雙非球面鏡片或個人化高階單光鏡片，就主要係唔滿足於普通鏡片或比較「眼利」嘅人。
如果想更深入去了解鏡片嘅話，呢一篇係好好嘅選擇: https://www.abdo.org.uk/wp-content/uploads/2012/06/CET131.pdf
