咁多鏡片，到底點揀好？
球面非球？非唔非好?
幾乎每個買眼鏡嘅人都有煩過做唔做「單非」甚至「雙非」，全行都會問個客但又唔會太解釋
今期想講嘅係一個好深同好悶嘅topic，我落筆前前後後都諗咗一個月以上。仲記得以前有個professor教我寫paper，第一句就係，「想像吓你依家係想解釋緊一d嘢比你阿媽聽，所以就寫呢篇文」，然後就變咗我嘅座右銘。不過今次真係有d難度，但又不得不寫，因為幾乎每個買眼鏡嘅人都有煩過做唔做「單非」甚至「雙非」，但我諗九成嘅客都唔知咩來，只係聽過，無咁扭曲，少d變形咁囉。未必係賣比你嗰個唔想解，而係呢樣嘢實在唔易解，今日我就試吓當大家係我老母，慢慢解比大家聽，睇吓大家明唔明。
先玩吓拆字，非球面（Aspherical)，字面解，即係唔係球面（not spherical)，所以先要解吓咩叫球面。球體（sphere)，即係廣東話嘅「波」，我諗小朋友都知波係咩嚟（大人反而會混淆咗第二樣嘢）。咁你叫個小朋友喺張紙度劃個波出來，佢就一定會劃個圓形出來。即係點？即係球體特點就係平均嘅弧度，而球面亦係同樣道理，整塊鏡片弧度是平均的。
喺講落去之前要講吓兩個球面鏡片嘅誤區，第一個就係鏡面係平嘅就係非球面。球面定義係表面平均嘅弧度，所以唔係個面平就一定係非球面，深近視玻璃鏡片個面一樣係平的（有機會再講點解要做平佢），而玻璃嘅車法全部都係球面鏡。而底非球面同雙非球面鏡片因為要compansate底彎非球面，所以個面係可以有彎的。
第二個誤區就係非球面鏡片戴起嘅效果一定比球面鏡好。大家要明白鏡片度數係一個底面彎嘅組合，所以計好底面彎同將度數以最好嘅組合擺喺鏡嘅兩面其實都好緊要，都見過唔少case個客淺近視，戴開球面鏡，轉非球面鏡反而覺得側邊有d矇，所以無話非球而就一定好過球面嘅，而蔡司亦有提供精密研磨同計埋最佳曲率組合嘅訂製球面鏡，效果一樣非常好。
講到咁，唔通非球面鏡一無是處？咁又唔係，要明白非球面概念係來自相機嘅，目的係修正週邊扭曲同過度嘅放大/收縮。所以其中一個配落眼鏡度嘅好處就係人地睇你對眼同面形就無咁收縮/放大啦；另一樣嘢就係對遠視度數深嘅客，非球面可以令鏡片週邊變形減底，亦有助鏡片減薄（因為球面設計做深遠視通常要一個高面彎同高底彎嘅組合，先做到一個理想嘅望嘢效果，咁就會好厚）。
講到呢度應該會有人問，雙非球面呢？底非球面呢？Freeform鏡呢？個人化鏡呢？….係，依家鏡片設計同命名千變萬化，咁淺白嘅文筆好難講到咁深入，不過用圖像加以輔助應該可以做得到。
大家經常都會見到上面嗰幾幅圖，我想講嘅係戴住眼鏡係唔會睇到咁樣嘅。因為鏡片同眼睛嘅距離其實好近，近到只有大約1cm倒，相反望嘢嘅時侯即使最近嘅景物，其實都有接近30–40cm （即係睇錶同睇電話嘅距離）︔所以戴眼鏡片係唔會咁明顯睇到兩幅圖顯示嘅邊緣扭曲嘅。咁點解要揀雙非球面(Double Aspherical)、底非球面(Backside Aspherical)、或者非環面鏡片(Atoric)呢? 其實眼鏡鏡片有咁多光學設計，係因為人眼同相機之類嘅光學儀器有一個好大嘅唔同，就係人眼係會有散光嘅:
至於點樣做修正呢？好早以前蔡司已經諗到「研磨點」呢個概念，即係將整塊鏡片好似切蛋糕咁切開40000份，由中心點開始每一點當成係一塊鏡片咁，計算嗰一點所需要嘅度數(有球面度數、柱面度數、柱面軸、稜鏡呢四個數據)。而呢D計算係需要客人嘅配戴數據(例如鏡片同眼之間嘅距離)，於是當生產技術配合到之後(即係Freeform)，個人化鏡片就成為可能。
去到今時今日，幾乎所有底非、雙非、個人化、etc etc….呢D個名好勁嘅鏡都會用上Freeform技術(最常見嘅現成雙非球面鏡片個模係freeform，而訂製鏡片就直接用freeform機車)。最後附上一張Nikon嘅比較圖:
