藍光會射盲眼？
以前夏天就個個都會問同買全視線眼鏡片，不過自從「抗藍光 」鏡片面世以來，D客就開始將個focus由紫外光擺咗落藍光度。
呢個始料不及嘅武漢肺炎，的確搞亂晒個世界(個人覺得凡事都要有破有立，所以亂其實都唔係咩壞事)，亦改變咗好多嘢。由Vacation到Staycation，大家開始發現旅行的意義不是越遠越豪華就越好，簡單本地遊，發掘吓自己嘅城市原來都好靚，一樣可以好多嘢玩。日常生活方面因為學校停課，好多學生同家長都無奈地「網上學習」，「在家工作」。都因為咁所以呢排多咗家長擔心有關電腦或者數碼產品藍光，對佢地自己同仔女嘅眼睛傷害。問嘅頻率已經多到一個合埋眼都要識答嘅地步，但又好可悲地唔知點解市面有嘅資料好多都係Marketing Information，即係點呢？即係比少少資料嚇吓你然後就搏命叫你買嘢咁樣囉。 其實眼鏡業界、視光行業甚至醫學界都未有一個定論，喺咁嘅情況之下，我都係羅列返我搵到嘅資訊同埋我嘅少少見解啦！
首先要講吓咩叫藍光。光有７色就大家都知，由紅到紫除咗顏色唔同之外帶嘅能量都有唔同。唔同生物需要嘅光都有唔同，例如種多肉植物需要大量藍同紅光（溝出嚟就類似色情架步嗰種粉紅色），但如果你用多肉植物燈做室內照明你應該會想死(雖然暗但眼會唔舒服)。相對於植物，人眼對黃綠光較為敏感，所以點解好多人覺得茶色鏡片睇嘢會光過同樣深度嘅灰色鏡片，都係呢個原因。
LED呢種低耗電高效能嘅照明技術，唔單止被喻為係人類照明嘅未來，仲帶嚟咗一個大商機，就係藍光從此無處不在
人眼對藍紫光唔太敏感係好耐之前已經係人都知（依家嘅低反光膜或者以前嘅玻璃會做紫藍膜，就係呢個原因），咁又點解「藍光」突然成為人人都留意嘅話題呢？呢個某程度同第一段講，Marketing嘅泛濫絕對有關。「高能量可見光」（即係藍光啦）指嘅係由380nm去到450nm嘅電磁波，即係人眼見到嘅紫藍光同一部分UVA（波長、電磁波、納米呢D如果對你比較陌生，請參考維基百科，再唔明留言問我）。以前呢D射線嘅主要來源就係太陽，所以戶外做好防紫外線，就可以有效保護到自己嘅皮膚同眼，而又由於藍光以往主要來自日頭先會出現嘅太陽，人體嘅生理時時鐘係會按眼睛接收藍光嘅多寡而調節。但自從LED光源嘅普及，由於LED嘅發光機制會產生藍光，而以往嘅燈具唔會有，再加上越來越多電子產品都係用LED背光，呢個好明顯係一個大商機，例如呢篇: https://www.paulaschoice.com/expert-advice/skincare-advice/sun-care/high-energy-visible-hev-light-and-skin-damage.html 。絲打對Paula Begoun 寶拉應該唔會陌生，佢專門研究護膚品同做消費者教育，最出名應該係佢話SKII其實只係加咗米酵素，就賣貴普通嘢好多，同埋好多護膚品嘅報告其實係護膚品自己比錢搵lab做個對自己有利嘅report。佢講一句室內藍光不可不防，好多絲打就會即刻擔心。但如果睇返各個研究(又引wiki: https://en.wikipedia.org/wiki/Biological_effects_of_high-energy_visible_light )其實藍光對人嘅皮膚同視網膜嘅破壞暫時都係講緊會加速老鼠細胞嘅衰老死亡，對人嘅影響暫時未有好權威嘅報告出爐。咁當然紫外線嘅傷害甚至吸煙嘅傷害都用咗好多年嘅時間先至證實到，所以陰謀論講一句，可能LED生產商同鏡片生產商都各自洗緊錢去做唱好同唱衰藍光都未定。呢D fact check唔到嘅嘢就留比大家去思考啦！
如果睇完上文，覺得防藍光鏡片多X餘嘅話，咁下一篇嘅嘢你可以唔使睇落去了，會講吓防藍光鏡片嘅種類同選擇，始終呢樣都好多人問，不過再寫有D長，就喺呢度收尾啦！
籠統講，如果你：
1. 成日長時間對電腦或各種電子產品。
2. 覺得呢D電子產品嘅光源整到你眼睛好唔舒服，甚至出現標眼水或者眼乾澀。
3. 夜晚瞓得唔好甚至失眠，而你又已經戒咗臨瞓前玩電話，但日頭用電子產品無可避免。咁我會建議你考慮一下配抗藍光鏡片。
