關於con嘅二三事

隱形眼鏡，有人會同你講上網買咪得，又會有人同你講一定要搵視光師驗清驗楚先好買，幾十蚊一個月又有，成千蚊一個月嘅又有，引軟有硬，到底咁多嘢，真係有分別？

面對隱形眼鏡，眼鏡業界一係覺得無肉食、好麻煩；一係就覺得只係一買一賣、無乜技術可言。喺我嘅角度嚟講，就係因為呢D態度，客人根本得唔到應有嘅資訊同知識，非常之唔健康。

隱形眼鏡近呢幾年喺眼鏡舖生意佔越來越少嘅比例，買con嘅人更多會喺網度買，然後直送到家。或者好多行家會歸咎於香港人護眼意識不足、香港對隱形眼鏡監管不足，網店拆貨漏洞等等。老實講與其好似中共咁鬧呢個鬧嗰個，不如諗吓點解市場會流失晒？網店可以送到上門，又可以慳租賣平，呢d嘢，實體店都幾難鬥。不過專業檢查、眼睛情況嘅跟進，網店一樣處理唔到咖啦！衰d講，其實好多客對con呢樣嘢都係一知半解，有唔少客得到嘅料都係來自網紅，尤其是依家color con盛行，color con變成妝容嘅一部分，個人覺得更加應該係同呢一班使用者灌輸正確嘅用con態度，而唔係恐嚇佢地唔幫襯視光師買行貨會盲眼。其實關於con嘅問答，喺之前開過嘅Post度，或者日常客人嘅查詢，都成日會遇到，以下簡單歸納吓，如果有咩想知，歡迎聯絡我再問。

con度數係咪一定要配淺D？

呢個當然唔係啦，除非有特定嘅要求或者眼睛調節力爭少少嘅客可能需要配淺度數之外，隱形眼鏡一般會配足度數。咁大家可能會話，唔係喎，真係淺D喎！其實呢樣嘢同「入眼度數(effective power)」有關。簡單講，一般近視超過3.00以上，因為驗眼儀器同眼睛之間有距離，但隱形眼鏡係貼喺角膜表面，於是就需要做換算（以近視嚟講即係唔需要咁深嘅近視度數），而呢個調整後嘅度數又多數係淺過眼鏡處方度數，所以就有一個「戴con度數要淺過戴眼鏡」嘅美麗誤會了。

(Image courtesy: https://contactsadvice.com/2017/01/3-ways-to-convert-your-glasses-prescription-to-contact-lenses/)英文嘅講法係叫more plus（即係更多嘅正度數，所以喺深遠視嘅情況下其實隱形眼鏡度數係要比驗眼處方度數更高。圖表只供參考，搵視光師驗眼配con，保障眼睛健康，方為正道！）

一路戴開A牌，隻con弧度係8.5，即係B牌嘅弧度8.5 con我都戴得？

不如咁講啦，你著開H&M 嘅中碼，係咪即係Uniqlo嘅中碼你都啱著呢？其實有一樣女性貼身衣物，同con好似，就係bra啦！相信各位女士都會發現，明明大家都寫住33C，但每個牌子著上身都有唔同感覺，一定要試過先知個分別喺邊度。隱形眼鏡包裝上面通常都會有鏡片直徑（Diameter)同基弧（Base Curve)，鏡片直徑即係隻鏡幾大或者幾細啦（太大就會好難戴上去，需要更多技巧），咁至於乜嘢係Base Curve呢？大家都知道隱形眼鏡好似一隻鑊咁吸落眼角膜度，個底就會貼住眼角膜。以往硬鏡嘅年代鏡片真係跟足眼角膜嘅大細，細塊過軟鏡好多，仲好硬身，如果唔fit，輕則好易甩鏡（以前睇戲成日有執con情節）、重則刮損眼角膜！為咗令隻鏡更好咁同眼角膜貼合，量度角膜弧度作為訂製數據非常重要。不過到咗依家，軟con甚至day con盛行，所有嘢都係ready made，而軟con本身比較大隻同有一定嘅延展程度，所以對角膜弧度嘅要求就無以前咁大，而大部分廠商都只會做兩個甚至一個弧度（median或8.6/8.7），喺日常驗配已經滿足到大部份客人嘅需求。但係既然係咁，點解仲有上文講明明基弧一樣，但戴上眼依然感覺有分別？呢個就要講到鏡片「設計」同「物料」嘅問題啦。軟con之所以要做到咁大隻，其實係因為要靠上下眼瞼嘅力，如果係散光鏡片，仲要諗辦法去令隻con穩定。而每個人嘅眼皮鬆緊同敏感度都唔同，於是就有夾到同夾唔到嘅問題啦！加上唔同物料啜身程度唔同，有D仲加咗表面處理，如此種種都會影響配戴感覺。而同bra唔同嘅地方係因為眼同con都咁細，好多嘢例如走位（戴耐咗易跌出嚟）或者偏緊（戴耐咗會好唔舒服甚至爆紅筋）都係要視光師用儀器睇先會睇到咖！

(Image courtesy: https://quizlet.com/188268711/clinical-optics-chapter-4-flash-cards/) 角膜弧度（即係上圖嘅base curve radius)，係隱形眼鏡其中一個重要生產數據；而鏡片直徑（diameter)係另一個基本參數。不過喺即棄軟鏡嘅年代，更多嘢需要視光師嘅觀察同專業判斷。

One day con戴一個月得唔得？

經常都會有客問，one day con戴多過一日得唔得，又或者兩星期con開咗之後戴唔夠幾次好浪費好蝕。其實喺未有「拋棄式隱形眼鏡」嘅年代（Disposable contact lenses 呢個概念，根據維基係1972年提出嘅），不論係硬鏡定軟鏡，好多人都係戴到爛，戴到唔舒服先掉。其實所謂長戴鏡（即係傳統用個樽仔裝住嘅嗰D傳統軟鏡）一般都係建議最長一年倒就掉。大家可以想像一下軟鏡其實好像海棉咁吸滿水，先可以保持柔軟。每日戴住，對鏡就會吸晒眼淚入面嘅蛋白質同油脂。如果無捽乾淨，就咁浸藥水就算嘅話，好多眼嘅敏感同發炎就係由此而生。而去到今時今日，定期拋棄甚至每日即棄做咗主流，上面講嘅情況已經非常少。但即使物料一樣（其實好多牌子two weeks同one day隻料係一樣)，鏡片設計有無考慮清潔同多次使用，都未必一樣，所以通常唔會建議。

Color Con係咪越大隻越好？

好多人搞錯咗個概念，就係隻con嘅大細，其實同隻con顏色範圍嘅大細，呢兩樣嘢無乜關係。con太大隻仲會比較難戴（有D叫鞏膜鏡Sclera Lens，比普通隱形眼鏡大得多，依家最主要係醫療用），所以一般con都會造14.2/14.5mm直徑，喺穩定同易戴呢兩方面拎個平衡。更重要而好多人會忽略嘅，就係color con如果喺眼度嘅移動同眼睛唔同步嘅話，係會好異相，仲可以好恐怖。所以驗眼配嘅時候視光師會睇埋隻con嘅Movement（其實透明con都會睇呢樣嘢，因為呢樣都會影響到長時間戴con嘅舒適同眼睛嘅健康。

(Image courtesy: www.contactlensxchange.com )一般嚟講，外圈越大，大眼效果越明顯，但遮太多眼白就會好似鬼咁︔同樣內圈越大，就越唔怕影響視力（因為暗環境，瞳孔放大，比色素層阻住嘅話睇嘢會有影），但對虹膜嘅修飾會差咗，就會無咁自然，一睇就知戴咗con咁。

暫時諗到咁多、希望大家戴con注意眼睛健康同衛生啦！