賣咗十X幾年眼鏡，既然你問得我，我一定會認真答！

一切都要由一個Post開始講起….

諗返起一開始自己純粹貪得意，當年m高登慢到想死，見到連巴另起爐灶，當然即刻由CD-ROM轉型做巴打。同時見到咩人都可以你問我答，心諗做咗十幾年眼鏡，點都對行內有少少認識同知道D得意嘢，就膽粗粗開個「賣咗十年眼鏡，你問我答」，一切就係咁樣開始。

睇返記錄，原來我喺lihkg答眼鏡問題原來都答咗一年有多（光陰似箭呢真係），答吓答吓到開到第7個po(多謝支持），由一開始諗住玩玩吓，到發現唔認真答真係唔得。既然都1001咗6次，計返就算得十分一係問，其餘係我吹水嘅，都起碼有過百條咁多條問題。其實有好多問題我覺得唔單止係一兩位巴絲嘅個人疑問，更加係每一個想配眼鏡嘅人，或者對眼鏡有興趣嘅人都想問眼鏡佬嘅問題。既然係咁，不如拎晒佢地出來，詳細解答，始終討論區篇幅有限。

其實我都想講吓點解會用medium，其實主要原因就係新屎坑，同埋FB已經有好多中文嘢，而medium喺中文社群尚未普及（台灣多d)，所以會試吓喺呢個平台做問答，加上遲吓可能有懶係技術文章，我諗我都可以班門弄斧，扮吓高深文青。

希望在將來嘅日子，隨著大家嘅支持，會越來越充實啦！